صاحبي وصلعته..!!!

لي صديقٌ بل هو قريبٌ كذلك يعاني من وجود صلعة في رأسه
طبعاً نتيجة تساقط شعر رأسه رغم أنه في بداية الثلاثين من عمره
زرته وكان وقتها قد تزوج حديثاً من أجل أمرٍ ما وكان ذلك بعد صلاة العصر وكان الحر شديداً
فخرج لي من منزله بطاقيته المميزة
فنظرت إليه ولأنني أحب ممازحته
قلت له : يا أخي ارحم الطاقية من راسك
أربعة وعشرين ساعة ما تخليها تفارقه
فقال : يا رجال والله إنه حتى في البيت عند أم العيال ما أشيل الطاقية من رأسي
أستحي من صلعتي .. ولا أبي زوجتي تشوفوها فتضحك علي
قلت : طيب وإذا جيت تنام عساك تشيل الطاقية عن راسك
قال : ما أشيلها إلا إذا نامت زوجتي قبلي
قلت : طيب وإذا صحت زوجتك من النوم قبلك وجلست تتأمل صلعتك اللامعة وانت نايم
والا صورتها بكاميرة الفديو وإلا الجوال والا خذت لصلعتك كم صورة فوتوغرافية .. للزمن والذكرى

قال : هاه تسويها بنت الذين آمنوا .. والله ولا جا على بالي .. أثري على نياتي

زين إنك نبهتني يا أخوي
أجل معاد اشيلها من على راسي أبد
إلا إذا جو يكفنونني ..
قلت : يا أبو الوليد .. الحين من جد تتكلم

يعني إذا مت ذاك اليوم تبي زوجتك وعيالك يضحكون على صلعتك بدل ما يصيحون عليك وانت ميت

وش تبي الناس تقول عنهم !
قال : رأيك ياخوي إني أكتب في وصيتي إن محدٍ يشيل الطاقية من راسي
قلت يا أبو الوليد : خلك واثق من نفسك

وخلك مثل قحطه في مسلسل درب الزلق تذكره حتى في ليلة عرسه من نبوية

مشخص بصلعته ولا همه أحد.. تجي تقول لي وصية وصلعة وش ذى الكلام؟؟

ثم إنهم يقولون وأنا أخوك إن الصلعة لها ميزات لا تعد ولا تحصى

يعني مثلاً إذا انجرحت في راسك واحتجت كم غرزة ما يحتاج يحلقون لك شعر راسك
على طول خياطة وغيرك ومنهم أنا بالشٍ بشعره .

ثم تخيل يا أبو الوليد إنك سافرت مع زوجتك في شهر العسل لماليزيا وضاعت منك زوجتك في الزحمة

من يوم تشوف صلعتك الاماعه من بعيد بتعرفك وبتجي عندك !

وما يحتاج إنك تحلق شعرك وتخسر نفسك فلوس وتضيع ووقتك في الانتظارعند الحلاق
أو إنك تشتري للشعر كريمات وشامبو أو مشط

كل هذي ميزات حتى أنا أحسدك عليها بشعري الناعم الكثيف الاسود !!

لا وأزيدك ميزة بعد لو تسوي جريمة بصلعتك هذي ما فيه أمل يحصلون شعره في
مكان الجريمة يعني يحلمون يعرفونك,حتى كونان التحري صعب يمسك عليك دليل

ثم تخيل حصل بينك وبين واحد مضاربة تقدر تاخذ راحتك وتسحبه من شعره سحب
وهو ما يقدر يسوي مثلك بس خله يسوي مساج لصلعتك بأيديه المسيكين

وأهم شي إن ترى زوجة الأصلع ما تغار عليه أبد أسألني انا..!!
لأنها تعرف إن ما فيه وحدة مهبولة بتاخذ زوجها الاصلع منها خاصة إذا كان على قد حاله ولا عنده قريشات

فاخلع طاقيتك يا أبو الوليد سمع كلامي وخل الناس تشوف صلعتك وإذا أحد ضحك عليها فردد حكمة الصلعان في كل مكانٍ وزمان :
( يوجد نسرُ أصلع .. ولكنك لن تجد حماراً أصلع )
،،،،،،،،،،،،


وإن كان عندك فلوس مثل الوليد فازرع شعر .. وخل عذالك يموتون قهر

سامحنا يابوالوليد تعرف خويك يحب المداعبة

يمدحون زيت ام الجدايل

قحطان طرح رااائع وقلم ارووع