يارجـل سجـي بالمرابيـع سجـي=خوذي بهن بالطول مدهل و منهـاج
سجي بروضٍ والنـدى بـه ينجـي=مسقيه بـرقٍ بـاول الوقـت لعـاج
ثالث شهر والغيـث فوقـه يكجـي=وسيله تزاما مع جهاريـه ثـم راج
وزام وتحـدر مـع شعيبـه يوجـي=ماكنه الا النيل مـع شـط سوهـاج
فيه الزهر غـب المطـر يرتهجـي=احمر من الياقوت وابيض من العاج
وعطر الخزاما والنفـل بـه يعجـي=وان هبت النسمة صفق مثل الامواج
والـى رقيـت النـازح المبرهجـي=رجمٍ علـى كـل المراقيـب منبـاج
والورق حسه فـي جنوبـه يلجـي=ويشرف على روضٍ تقل فرش ديباج
ارخي انظار العين مـع كـل فجـي=حتى يهيض من الحشا كـل مـالاج
روابـعٍ مـع بـاب قلبـي تهجـي=ويفتح لهن قلبـي ثمانيـن مـزلاج
تقفـي وتقبـل بالضميـر وتخجـي=بين الحنايـا كنهـا شعلـة سـراج
دنياك هذي مبلشة يـا بـن حجـي=تعطي زبـاد بكـف وبكـف كربـاج
وحروفهـا مـا تنقـري بالتهجـي=وان عاكست ما فادها طب وعـلاج
ايـام فيهـا امطـار وايـام عجـي=وايام بيـن وبيـن مافيهـن انتـاج
احدٍ ضحك واحـدٍ دموعـه تزجـي=واحدٍ رقـد واحـدٍ رقـاده تغمـلاج
واحـدٍ زمانـه مقفـيٍ مستهـجـي=واحدٍ زمانه مقبـلٍ ضاحـك حجـاج
دنيـا جبـال الارض منهـا ترجـي=عندك خبرهـا نشفـت بيـر هـداج
يـا شينهـا يـوم انهـا تستلجـي=لولا ولي العـرش يفـزع بالافـراج
والله من اصحاب المصالـح ينجـي=اهل النفـاق معاونـة كـل هـراج
اهـل الكـلام السامـج المسمئجـي=سود النوايـا والخفايـا والامهـاج
جنبتـهـم ياعلـهـم للـمـدجـي=ماني رفيق اهل النمايـم والاحـراج
مـادام انـا لله صومـي وحـجـي=مالي ومال الخلـق عـدلٍ ومنعـاج
