يالجاهل اللي تحسب ان الوفى له يوم محتوم=انا لحقني من اللي للوفى والطيب عنوان
ابويه الله يديمه تاج راسي دايم الدوم=اللي ليا جا له المحتاج غير ايروح طربان
ان جيت في مجلسه ترتاح لونك قبل مهموم=والضيف يوفي حقوقه كلها من دون نقصان
والجار عنده على طول الزمن غالي ومحشوم=لونه بعيده دياره يذكره ويقول جيران
وانا معك كنت وافي لين شفت الدرب معقوم=ولاهو خطاي ان هجرت اللي يحب افلان وفلان
منته بملزوم في حبي ولاني فيك ملزوم=كلً عساه ابطريقه يسعده خلاق الاكوان
ماودي اشرح وش اللي صار لكن جتني علوم=خليت نفسك بري وتقول انا اللي كنت غلطان
كنت انت عمري ولافي بالي اخليك في يوم=واغليك حتى اكتشفت انك على فرقاي شفقان
نفسي عزيزه ولي مبدى ولي عادات وسلوم=لايمكن اقبل على نفسي تقول فراقنا حان
ماني بندمان واللي صاركله كان مقسوم=انته لغيري ورزقي عند رب الانس والجان
لاتحسبني على فرقاك ضايق كلي هموم=ولاتحسب اني على ذكراك طول الليل سهران
دام الوفى في حياتك ماله ايا كرت معدوم=قلبً سكنته عطاك امر الخروج وصرت نسيان
