يجود السحاب احيان واحيان مابه جود=ولو غطت غيومه بساط الوطا من فوق
ويمين الكريم تجود طول الزمن وتزود=سحايب عطاها ترضي الرب والمخلوق
وهذي سجية بالوحيشي وعقب جدود=لبس بشتها وعقالها فالح المرزوق
فتح باب ديوانه وفعل الكرم مشهود=بمد اليمين اللي عسى مايجيها العوق
زهى مجلسه بالبن وحلو النبا والعود=وجزايل يقدمها ولو شاط سعر السوق
ويعطر سواليف الرجل هرجه المحمود=وهبه الولي للي معه طيبة المنطوق
والى عمسة الاريا يجو له يفك عقود =ويرضي جميع اطرافها رايه الموثوق
سلايل رجال الطيب تارد عليه ورود=مقاطع حقوق وترتضي لو عليها حقوق
اوحشــــه الى النخوه كما ثورة البارود=تكاتف يدين رجالها ماتعرف البوق
تجيب الكرام كرام وتجيب الفهود فهود=وفالح به الثنتين مجبد نسب وعروق
بجاه الكريم الخالق الرازق المعبود=عسى الخير لبو عنــــاد طول الزمان اوفوق