{ هذا خـــطاي } جديد .. عايد السميري

!

!

هنا .. هنا .. وإن قلتها ينفتح باب = على الحقايق كل يوم(ن) وليله
وأرمي مشاريهي على وجيه الأصحاب = وأسري وأنا ( أبو زياد ) راع الأصيله
لن الخطاء لو صوب القلب ما صاب = والصايبه طاشت ولو هي ثقيله
ولا أدري خطاي إني ما أجامل على حساب = أكسب رضاء اللي جو لنا بالهزيله
والا .. لأن الصدق له مخلب وناب = وأدمى كبود أهل الكبود الغليله
كذا .. كذا .. ماعاد لي آي مجناب = يامشعل الفتنه براس الفتيله
أسمي يكفي عن كثيرات الألقاب = ما جيت أدورها وأنا لي قبيله
ولي منهج أمشي به ولا أمشي بلا .. اسباب = وكل(ن) بمنهاجه وعقله دليله
أرفع نظر عيني على راس مرقاب = وآصل وياكم واحد(ن) طاح حيله
شاعر وشعري ما أكتبه ودي إعجاب = ولا همني من قال دره جميله
شعري هجوس أهيجنه (همّ ) وإن غاب = أشتاق له شوق الخليل إلخليله
أصدق من أدموع المفارق للحباب = وأطهر من الغايه اليا أصبح وسيله
غموضه إيبين لي وجيه الاغراب = وحرفه عزاه إنه كبر قبل جيله
كبر وهم شابو وهو تو ما شاب = وأطيبهم اللي هقوته ما تشيله
لكن بهيجن .. ينفتح / ينقفل .. باب = صوتي يرد الذاكره للجزيله

* عايد الســــميري
18 / 7 / 1431 هــ

الشاعر العلم عايد السميري

عظيم يابو زياد كل بيت من القصيده يقول الزين عندي

ولايجي منك الا الزين 0 تحياتي وتقديري لشخصك الغالي

وتقبل سلامي