الحــــقـــــــد واهل الحقـــــــد

لعنبو من يقبل الذل لـو يبقـى عليـل
والحقد واهل الحقـد كيدهـا بنحورهـا

عادتي مامد إدينـي مثـل مـدة بخيـل
ولا استمع حكي العواذل ولا اخذ شورها

الوفي اصله وفي والذليل اصلـه ذليـل
والكرامه عند الاجـواد تاخـذ دورهـا

الاصايل لاعشقت تعشق الحر الاصيـل
والكدش لأهل الكدش نازله بحدورهـا

صاحبي ادخل على الله وانا عندك دخيل
جيت يمك يوم غيرك تضيق اصدورهـا

واهني اللي يشوفك ويفرح بـك خليـل
شبه وضحا لاطلعت رائـده بمرورهـا

الثنايـا كنهـا لولـوٍ صفـت فصيـل
والعيون الساحـره تغرقـك فبحورهـا

ماهقيت اني بحياتك مثل عابـر سبيـل
طاف بديارٍ غريبـه وغـادر سورهـا

راح في دربه وهمه مع احزانه يشيـل
والليالي السود ردت عليـه ابجورهـا

اصبر وصبري تخطى حدود المستحيـل
ثابتٍ مثل الشجر لوتمـوت اجذورهـا

الجمل لاطاح كثرت عليه اللـي تشيـل
والسيوف الحاقـده مابقـت بجفورهـا

الزمن هـو الزمـن ماتغيـر ياهبيـل
النفوس اللـي تغيـر وزاد اشرورهـا

من تعب بالزرع لابد مايجني الحصيـل
فرحتة بالعمـر زادت وزاد اسرورهـا

الردي يبقى ردي والكرم طبع الاصيـل
والقمر والشمس محدٍ يغطـي نورهـا

لعنبو من يقبل الذل لـو يبقـى عليـل
والحقد واهل الحقـد كيدهـا بنحورهـا