الفقر شــــين

الفقــــــــــر شــــــيــــــــــن
.................................................. ............
كلمه نسمعها ونرددها دون ان تلامس احاسيس بعضنا يعني زي ما يقولون كلمه عابره لان اكثرنا ولله الحمد بخير
ولا يحس بمعناها الا الذي فعلاً تعنيه بكل ما تحمل الكلمه من معنى اعزائي الاكارم لااريد ان اطيل كي لاأمل
وتقولون بن سوعان اسهب واطال قد مررت بموقف مؤثر بالنسه لي في احدى المرات كنا مسافرين ومعي واحد من الجماعه ولفينا ديره وتذكرت فلان من الناس خوي وصديق قديم تربطني انا واياه روح الموده والزماله يوماً من الايام وتذكرت هاك الرجال وهو من خيار القوم وخابره بحاله طيبه يعني عنده حلال ومال بالاضافه الى مكانته في ديرته وجماعته فاشرت خويي اللي معي انا نمر ونسلم عليه ونشوفه وانتحرا اعلومه ففوافقني الراي وجيناه في محله ولما شفنا وضعه ما اعجبنا الرجل هلا بنا ورحب وجدد القهوه ولكن على وجهه علامات التعجب المهم حاولنا بشتى الطرق ان يسمح لنا بمواصلة رحلتنا ولكنه رفض واقسم باغلظ الايمان على ان يقوم باكرامنا المهم اخذنا واجبنا منه وباكمل وجه دون قصور وبفلة احجاج نشدناه عن احواله ولم يقل الا كلمة ابشرك بخير ولله الحمد, الخير واجد والامور طيبه ولكن الحقيقه انا احسها غير مشينا وخاوانا واحدً من معازيمه والظاهر انه من جماعته ليدلنا على الطريق اللي حنا سالكينه واخبرنا بسر ما اخفاه عنا معزبنا وسرد لنا قصته التي كانت مؤلمه ومحزنه بنفس الوقت هنا صارت رددة الفعل وبغينا نرجع له فقال الرجل واقسم ان درى اني علمتكم فسوف يذبحني وانا طالبكم يالنشاما تجعلونها سر بيننا .

هنا هاضت قريحتي ونظمت هذه القصيده مع عدم ذكراسم صاحبنا والخصوصيات نزولاً عند رغبته واحتراماً لمشاعره وخوفاً على الرجل الذي اطلعنا على ما كان خافي علينا من اسرار مؤلمه

القصيــــــده :

انا اشهد ان العوز هم الرجاجيل ,,,,,, وضيمً على اللي يحوشه ويبتليبه

الفقــر شين وصاحبه دايم اذليل ,,,,,, لــو هــو عــزيزً والعـرب تقتديبه

عـوق النشاما كا سبين التنافيل ,,,,,,, اللي لهــم صـوله وجـوله وهيبه

اللي لهم تاريخ يـذكر مع الجيل ,,,,,,, اللـي مضـى وفيه الليالي امريبـه

وبيوتهم لاهـل المـروه مـداهيل ,,,,,,, وكلــن يروده بالســنين المنيــبه

مضايفً يعمل بهـا البـن والهيل ,,,, ولو زاد سعر الكيف يشرون طيبه

بنـن يسوى في اعذاب المعاميل ,,,,,, وبالصيــن قلـــط للــرجال النجيبه

ذباحةً للضيف من شـمٌخ الحيـل ,,,,, وفوق الشحم سمن العداني صبيبه

وقولة هلا وحييت ما به تماهيل ,,,,, ورثً وعـــــاده للجــدود العـــربيه

مـلاذ يذري عن سـهوم النوابيل ,,,, ويحشم بهم من كان يدرى حريبه

مضى لهم دورً على قرٌح الخيل ,,,,,, فوق الاصايل ما اعتنوا بالهليبه

حوض المنايا يقحمونه كما السيل ,,,, هــذي حــقايق والفعايل عـجيبه

حــريبهم يشرب من الويل بالكيل ,,,,,, بمصقـــلً بتٌـــــار يقــزا طلبيـه

ريف الخوي والضيف والجار وادخيل ,,,,, اجواد ما قد قيل فيهم معيبه

واليــوم ياوقـت الخنـا والبهاذيل ,,,,,,, خـانت ايامـك بالرجال النجيبه

واســيتهم بالامعــه و المخــابيل ,,,,,,, الله يخـــونك يازمــان الغليــبه

جرت وجنيت بحق ربعً مشاكيل ,,,,,, وفعايلك ياشــــين مااحدً رضيبه

رفعت فرخ البوم واغويته ابحيل ,,,,,, وخـليت زيزوم العرب يحتميبه

وصار الثعل يفرس بك الذيب مايسيل ,,,, وقــام يتشبهبه ويقنب قنيبه

واللي من اول في احساب الزواميل ,,,,, اليــوم يبــدعله اعلومً عجيبه

شــاخ ابزمـان اللفلفه والغرابيــل ,,,,, يامــر وينهــى بالامور الصعيبه

وابي اطلب اللي فصل الكون تفصيل ,,,,, يظهر قمرها من مغبة مغيبه

الله كــريمً والليــالي مــــــقابيل ,,,,,, ولابــد يعــود الما لمجري شـعيبه

سبحان منشي مزنها والمخاييل ,,,,,, وعقب القحط بيداه تصبح خصيبه

محمد بن سوعان الربيٌع

الله الله
قصيدة جميلة ورائعة جداً
الف شكر لك
مبدع

قصيده راااائعه


صح لسانك

حوض المنايا يقحمونه كما السيل ,,,, هــذي حــقايق والفعايل عـجيبه

حــريبهم يشرب من الويل بالكيل ,,,,,, بمصقـــلً بتٌـــــار يقــزا طلبيـه

ريف الخوي والضيف والجار وادخيل ,,,,, اجواد ما قد قيل فيهم معيبه

اصبة الهدف بدون مجامله

اولا : صح لسانك

ثانيا : بعض الرجاجيل يوم يلفي له على عرب مايبخصهم زين ...
وانت رجل فطين من يوم شفت ملامح وجه المعزب الاجودي بخصته زين ...

// وهذا من طيبك وانا اخوك يوم نظمت فيه القصيده الجزله من شاعر جزل ....

بس فيه ملاحظه بسيطه في قافية البيت اللي انت تقول فيه } وقولة هلا وحييت ما به تماهيل ,,,,, ورثً وعـــــاده للجــدود العـــربيه {{ : العريبه وليست العربيه : >> خطاء مطبعي وليس من الشاعر ...

حبيت اسوي تنويه لك .... وان شاء الله ماثقلت عليك بردي

تحياتي لسموك

كنت هنا } سلمان مهجع الهرفي

اشكركم اخواني الاكارم جميعاُ
وتقبلوا فائق احترامي وتقديري لكم
على مروركم اللي والله انه اكثر من رائع
وانتم الاروع والاجمل
واطرائكم والله انه وسام اضعه على صدري
دمتم اخواني
لاهنتم ووفقني الله وإياكم لما يحب ويرضى
اخوكم ابو فهد