ودّي أعانِد خاطري اليوم واطريك

وِدِّي أعانِد خاطري اليوم و اطْرِيك=لَو ما لِقيت الحُب يَكفِي عَذابِك
ودِّي أكابِر أصرخ اليوم مَا بِيك=هذي دُموع العين والَّا سَرَابِك
ودِّي انا امْحِي مِن حياتِي ليالِيك=ألقَى حياتي كِلَّها عِنْد بابِك
وشلون نَبضِ(ن) عَاف قَلبِك ينادِيك=وشلون حِسّ(ن) مات نَادَى هَلا بِك
وشلون حِسّ(ن) عاش مَيِّت و يَرثِيك=وشلون قافي خَان حِسِّي و جَابِك
شِمِّيه قافِي فِيك و القَلب نَافِيك=مابين ورد الشُّوق وردة عِتَابِك
شِمِّيه وردِ(ن) فَاح فِيهَا مَعَانِيك=شِمِّيه وَردِي يشتكي مِن غِيابِك
وشلون عايش فِيك تَايه بخافِيك=أثْرِيه رِيقِك سِم و القَلب دَابِك
العيب ماهو عِشق قلبِ(ن) يخاوِيك=العيب غَدرِ(ن) فِيك هانِك و عابِك

خالد البلوي