غناة النذالة

رزقاً يجيني من ورى النذل مابيه
لا بـارك الله فـي غـناة النذاله
مقلط على زاد بقى منه تاليه
ولا أشارك المسكين صافي حلاله
والكلمه اللي من وراها مشاريه
خليتها لأهل القفى والجهاله
واللي يوردني معه سكة التيه
لو هو حدى أخواني تركته لحاله
ماله سوى حق النصيحه تقديه
من باب واجب ماوراها جماله
والناس كلاً قيمته في مباديه
من خش سوق الطيب ياخذ مجاله
ومن يصنع المعروف من راحة ايديه
يِذكر بفعله وإن تردو خواله
وكم من ردي ماتعدى مواطيه
يجبر ردى فعله مواقف عياله
عيب الجسد ثوبٍ من الخام يكسيه
وعيب الطبايع مايغطا خماله
الحق واضح وأكثر الناس يغديه
والمسعد اللي لا أستدله سعاله
انشهد إن الله يحبه ومهديه
ياحي والله بين الأجواد فاله
أطيب حلاله للمساكين معطيه
ينفق ولا شافت يمينه شماله
ولآّ ردي النفس ربي معنيه
يزيد من كد المخاليق ماله
وكم جاهلاً زيف الليالي ينسيه
إن العمر له حد ماهو طواله
وإن جاه من يشكي زمانٍ مجافيه
بكره إلى منه تضايق شكاله
كلاً خذى من عسرها مايكفيه
من طبعها ماتستوي بالسهاله
تضغط على جرحٍ تشافى وتدميه
وتحيي صواب القلب بعد إندماله
يبكي بها من عزه فراق غاليه
تقطعت من دون وصله حباله
ويبكي بها من والده كان مغنيه
عن حاجةٍ عند الردي والحثاله
يوم ألتفت والناس حوله تعزيه
قالو توفى أبوك وأقفت رحاله
غدى نهاره ليل تسري سواريه
ولا به نجوم تعوضه عن هلاله
ولامن رفيق لا تضايق يسليه
وعن عثرة الدنيا اذا طاح شاله
دربٍ مشينا به بلا شك نطويه
ماللعمر وإن راح عمراً بداله
ياهيه لا تغتر بالوقت ياهيه
خذ لك زهاب وشد فوق الزماله
الله عليم بظاهره مع خوافيه
في محكم التنزيل بين مقاله

#وازن أبو شامه

الله الله وماشاء الله تبارك الله وصح لسانك قصيده جزله ومعبره وتحاكي واقع موجود ونعيشه فعلا .... رساله والشعر رساله بارك الله فيك وبيض الله وجهك

ماشاء الله نص رائع

لا فض فوك يا شاعر

و صح لسانك

اقدم لك هذا التصميم اهداء مني لك



اضغط على الصورة كي تراها بحجمها الكبير

الله الله عليك

قصيده جزله من شاعر جزل


أشكرك على هذه الرائعه والى الامام دوما



تقبل تحياتى

صح لسانك ياشاعرنا القدير الشاعر وازن ابو شامه على هذه القصيدة

ثاقب النظرة
حاتم
سالم
محمد
صحت أبدانكم ولا عدمتكم ياعزوتي عساني مافقدكم وتبقون دوم ذخر والله يجملني معكم يالغالين

حاتم:الف شكر على التصميم يامبدع الى الأمام بس لاهنت لو تأكد من أسمي بس 😁