الحلقه الاخيره من عودة الاصدقاء

بسم الله الرحمن الرحيم
السلام عليكم ورحمة الله وبركاته
كان الوقت العصر الطويل والجو مغيم والرعد له رزيزه والعقربان له وزيزه>> ابوك يا الوصف
والخيال نخيله على ابو راكه ( ترجمه لغير الناطقين للهجه الهرفيه>> > أي
زي ما تقول تسمع الرعد وتتوقع المطر على المكان الفلاني )
والريح هبت ما تسمع غير صفير الهوا بالهضاب ولا تشوف غير الابل
تقرطت من مفاليها للوديان ادور الذرا ( تقرطت تعني نزلت )ولا تشوف غير
الغربان لها وغيق اقطع اقطع مروحه لاعشاشها ( الوغيق أي صوت الغراب
عندما يقول غاق غاق >> ابوك يا الترجمه الا على طاري الغربان
كنت وانا صغير تسرحني جدتي بطليانهاو كانت دايم توصيني يا وليدي
احرص على بهمك خلك صاحي ولا سمعت الغربان تقول غاق غاق
قل لها غراب غراب بفمك تراب
تراها وانا جدتك تنادي على خالها الذيب وتقول خال خال
أر أذنيبات أرخال يعني تدل الذيب على طليانك مار احترص لاسمعتها
وخلك بوسط بهمك مثل المخيول المغزوز المهم انها من كثر وصاتها لي
صارت معي فوبيا الغربان حتى اذكر مره وسريتنا صافه
في طابور العرض الصباحي للتكميل مر من فوقنا غراب
ونا أطش ابريهتي العسكريه بالسماء واركض وراه وهو يقول غاق غاق وانا
اقول غراب غراب بفمك تراب

ولادريت غير باللي مسكني من غاربي ولنه قايد سريتنا وقد
تأبط شراً ويجحم بي والشرر يتطاير من عينيه ما ادري علامه
وقال لي : أيش هادا يا بويا أنت فاكر نفسك فين هاه
الكلام اللي أنتا قولته دحينا والهيصه اللي أنتا عاملها
أبقا قولها هيناك عند معيزكم وخواريفكم أنتا فاهم
واللا أدهملك دحينا بالميدان حتى تقول غاق غاق
المهم تقل كني سجيت مع وصية جدتي أمر من سجة
يوسف العصيمي بشعره الى ما اللجنه تقعدوا له واعطوه نسبه
أقل ما يقال فيها أنها تحطيم للشاعر حتى انا وجدتي أنذهلنا
من هالنتيجه اللي عقبها من يوم جدتي استلمت شونها
قسمته بيني وبينها وقالت يا وليدي أنت صوت لمريبد
ولذاك الشاعر ابو شوشه اللي يقول وز بعينه الى منها ذابت
وانا ودي أصوت لجليل السعوف الليد ابو مسبحه بنيه
............
لا بالله سجيت بالحيل
......
المهم وكان الوقت العصر الطويل والشتا زقح من الغرب
ولن في شايب مرقب له براس جلف (جبل ) وكل ما شاف
له سياره وهو تعرضها ينشد عن رشيد وقوقل من عقب روحتهم فقد
لحم الارانب اللي كل ليله وهم معشينه اياها وقال لاعادت من شروط ليتهم يرجعون


المهم ...نرجع لمعيض وتدريبه لرشيد وقوقل حيث غز لهم دمسين
مرمى وقال لهم يا الله وروني شطارتكم وقال يا اللا يا قوقل شوت
الكوره وعطها لرشيد ولن قوقل مشصب بمكانه تقل عمود
ما طاريه يتحرك وبس يزرط ريقه ويتلفت فقال معيض :
خويكم هذا علامه لا يصد ولا يرد
وين الدكتور فايز ...... يا فايز ...... هالدكتور هذا وين لقا وين راح
فقال سالم بن عيد : دكتوركم أرعه منبطح عند مسؤول
التغذيه حقكم يترشفون قواطي منقا وموجه على هالبرق له
ونونه ويكتب بدفاتره اللي معه

فقال معيض : ألين هالدكتور ما ينلام من يوم طلعنا وهو
ما له شغل غير مسؤول التغذيه نوب يقيس الحراره نوب
يصبخ على جبهته من هالكمادات
واثناء ذلك اقترب زيدان من قوقل على أثر أشاره منه
وقال له : يا اخوي يا زيدان قل لمعيض يدير الملعب بالسليله (بطن الوادي
أي طعس ) انا مقدر ألعب بالحماده من عقب ذيك المره يوم شت الدمس وأنرض أبهامي
قال زيدان أجل توخر أنت وخل رشيد يشوت الكوره
فاشر رشيد لزيدان وقال : يا اخوي يا زيدان قل لمعيض فنيلتهم هذه ضيقه
واحسها تحبس أنسمي أحس أني تقل عيل مزهمل
بهالفنيله الغبرا قل لهم ما نعرف نلعب غير بهدومنا الاوله
انا العام بنهار واحد سجلت بقوقل تسعين قول بدون تطقيمتهم
ولولا الشمس غابت كان عديت الميه
قوقل : أه تسعين !!! تسع وثمانين
رشيد : واكوبتي اقل لك تسعين يعني تسعين
قال قوقل : تسع وثمانين ما يزيدن هدف واحد
رشيد : أنت ما ودك تزرط العافيه وتعترف بالتسعين والا أصقعك
بهالمروه أخلي رجلك حطب
فأشتد النقاش وخرج عن السيطره فلمح الموقف معيض
وأستغرب الحدث وصوت على زيدان وقال له : لعيبتك علامهم ـــــــــــ
تركوا الكوره وصاروا مثل الزمل الهيج كل واحد يزوم على الثاني
فأخبره زيدان باللي جرى وبمطالبهم
فتفاجأ فطش عقاله من هول الصدمه بلعيبة زيدان ـــــــــــــــــ
وزهم على مسؤول التغذيه والدكتور وقال : مشينا يا الربع
قال زيدان : يا الله مشينا
معيض : وين يا هاب الريح مشينا خلك عند اخوياك دربهم بثيابهم
على اللعب بالطعوس
هذول ما يصلحون حتى لعيبة كورة يد
فزقم زيدان ما طاب له كلام معيض
وطالت وقفته وسجته مع قفاية سيارة أخوياه وحانة منه ألتفاته لرشيد
وقوقل واذا بهم ما زالوا يتطالبون أقل لك تسعين لأ أنا أقول تسع وثمانين
فقال لهم : يا جماعة الخير ما عاد فيه لا تسعين ولا تسع وثمانين
وقعوا وطبوا الارض وانسوا شي اسمه فريق دمج
وخلنا نرجع لديرتنا ولعمنا
قال قوقل : عمنا منين نجيب له راس ضبعه وراس قرطه
وباقي شروطه
قال زيدان : ولا يهمك يا قوقل انا اعرف حديقه بالرياض هذول
كلهن بها رح تصور معهن وجب اصورهن لعمك وقل شف يا عم
من شجاعتي مسكتهن وتصورت معهن واطلقتهن حرام أذبحهن
فاتفقوا على ذلك ورجعوا لديرتهم وصداقتهم عادت قويه كما كانت
وركبوا سيارة قوقل ومسجلهم يرطن
كنك قطوع وعندك السر ضاعي ...... رد الوداعه لا تضيع الوداعه
المشتري الى اشترى ما يراعي ..... اللي يراعي مثل راع البضاعه

تمت بحمد الله حلقات مسلسل عودة الاصدقاء
علما بأن أحداث هذا المسلسل وشخوصه
لا تمت بتاتاً وألبته للحقيقه بصله
وهي من وحي خيال الكاتب اللي هو
أخوكم أوسكار الهرفي

وركبوا سيارة قوقل ومسجلهم يرطن
كنك قطوع وعندك السر ضاعي ...... رد الوداعه لا تضيع الوداعه
المشتري الى اشترى ما يراعي ..... اللي يراعي مثل راع البضاعه

ماشاء الله عليك يااوسكار مدري من وين اجيب العلوم والسوالف الاوله ابداعك وتميزك يجعلنا نتشوق الى كل ماتكتب بهالمنتدى بالتوفيق والى الامام

اوسكاااااااااااااااااار


.

وحجز للمقعد الثالث ..

مبدع مع مرتبة الجنون

.

اوسكاااااااااااااااااااااااااااااااااااااااااااااا ااااااااااااار


مبدع دائما

وخاصة ب الترجمه لغير الناطقين للهجه الهرفيه

اما اهداف رشيد بالفعل تسع وثمانين ما يزيدن هدف واحد

واصل ابداعاتك

غراب غراب بفمك تراب
موروث شعبي يضاهي قصص الحيوان للجاحظ
مع حفظ حقوق الطبع
شكرا لك يافيلسوف الناطقين باللهجة الهرفية