الظيف يوم إنه ينادي ورى الباب = مانرسل النسوان له يصدفنّه
ياحمود وافق ظيفنا طاب ماطاب = ياحمود هاته والحق الظيف قنّــه
اشتر خروف إن شفت بالسوق جلّاب = وهاتوا لي الخوصه وهات المسّنّه
وادع الرفاقه للغدى وادع الأجناب = قدّم لهم قبل الغدى تمر شنّه
مع دلة يطرب لها كل شرّاب = مهيّله مافيه ونّه ولنّه
ترى الليالي والنهارات بحساب = ياما بنن قصر وياما اخربنّه
والشب مايرجى على واحد شاب = يومن عجبات الصبا فارقنّه
يصبح غريب ولا يدانوه الأحباب = ياحمود يوم ايديه ماينفعنّه
اللي مظاله بأول الوقت ما ثاب = الى انّه اصبح يزعج الصوت ونّه
المفضلات