سـوق الأسهــــم

عـن سـوق الأسـهـم يكتـبـون التقـاريـر = وانـا عـن أهـل الـسـوق سـويت الأبـيـات
في السـوق قـبل العـام كـلاً لحـق خـيـر =والـلـي يـحــط ريــال يـلـقــاه مــيــات
كلاً دخـل فـي السـوق مـن دون تـفـكيـر= كـلاًً يـبـيـع ويشـتـري فـي السـهـيـمـات
والناس ما تـدري وش الـلي به يصـيـر = مـا يـعـرفـون أمــوره الــلـي خــفـيــات
أهـل الحضـاره والـرجـال الـمـشـاهـيــر = مـن شـانـهــا بـاعــو جـمـيـع الـعـقــارات
وأهـل الـبــداوه والـنـيـاق الـمـغـاتـيــر = بـاعــو غـنـمـهـم لـجـلـهــا و الـنـويـقــات
وتـشـوفـهـم في الـبـنك صفـو طـوابـيـر = لا سـمـعــو ان الـبـنـك فـيـه اكـتـتـابــات
والـيـوم طـاح السـوق مـن دون تـبـريـر=والـلـي ربـح مـيـات خـسـران الـوفــات
الـنـاس صارت تخـتـلـف فـي الـتعـابـيـر = كـلاً مـن الـلـي صــار عــنــده قـنـاعــات
أحـداً رضي في قـسمـته وأكـمـل السـيـر= وأحـداً حـصيله صـار في القلـب جلـطـات
وانـا مـن الـلــي سـيـرتـه الـمـقـاديــر = وأخـذت لي في السـوق صـوله وجـولات
والـلـه مـا حـصـلـت غـيـر الـمخـاسـيـر = بـعــد الألـوف أصـبح رصـيـدي ريـالات
خـمـسـيـن فـي الـمـيه على أقـل تـقـديـر = مـن راس مـالـي كــل ابـوهـا خـسـارات
والـلي حصل في السوق خـطه وتـدبـيـر =مـن عـالـي الـقـمـه هـويــنـا مـسـافـات
مـا هـي عـلى مـا قـيـل لـعـبة هـوامـيـر= مـاهـي عـلى ما قـيـل سـرقـة عـصـابات
الـلـي حـصـل مـفهـوم لأهـل الـتفـاسيـر = مـن شـهـر فـبرايـر عــطــونـا الأشـارات
قـالـو لـنـا يـا ناس في السـوق تـدويــر = لا تـتـبـعــون مــروجـيــن الأشــاعـات
يـا مـا مـن الـلـي صـار جــتـنـا تحـاذيـر = لـكـن عـلـى مـا قـيـل هـيـهــات هـيـهــات
وآخـر كـلامـي فـيـه عـبـره و تـذكـيــر =السـوق مـات وصـار في إعـداد الأمــوات

(( ابــو ســيـــــــف ))