البيان الإلحاقي عن (بقية القصائد)

البيان الإلحاقي الخاص بمسابقة ( شاعر يتربع على القمة)


حصل على المركز الثاني

قصيدة الشاعر / أسعد السحيمي رقم (1 )

ياشعر خذني من جذوري / فأنا تبت=خذني معك فكره .. ولحن .. وربابه
خذني تراني فيك .. ياكم تغلّبت=على الزمان ألي .. يجير بشبابه
ياشعر أنا جيتك .. وياكم تعذبت=إكسب جميل ألي .. تزايد عذابه!!
ياشعر إذا شرّقت فيني .. وغرّبت=ماهو غريب إني !! أحب الغرابه
بين الألم / والظلم / يآآآآما تصلّبت=وبين الحنايا همّ .. يقصُر غيابه
ما أذكر إني في حياتي .. تعذربت=وألا .. تغفلّت .. الضرير بشرابه
أصبر إذا .. أفشيت سري .. وسرّبت=بعض الخوافي دون .. كتم وحجابه
ياكم تكسّر خاطري وكم .. تسببت=بإحراج شاعر( آآآآه) محد ٍ درابه
بس الأكيد أني بما فيك >> جرّبت=وكيف (السكوت) يقيس .. غالي ثيابه

/

/



حصل على المركز الثالث


قصيدة الشاعر / عبد الرحمن بن شذيان الجذلي ..رقم (6 )

بالشاعر اللي يكتب الشعر رحبت=لون مابيني وبينه قرابه
قوميتي للشعر فيها تحزبت=بيني وبين القاف ود ولبابه
شديت حيلي للمنافس ولاهبت=فكري على استعداد وقت الحرابه
اسنده مع خبت وحدره خبت=ولعب بقافه مثل لعب الربابه
له مدهلاً في خافقي به توجبت=اسقيه من دمي وفكري ترابه
لين اعصفت بك زحمة الكون وكتبت=يكون منفس خاطرك عن عذابه
تطرب له القيفان لامن تجنبت=بعض العلوم الناقصه لنحكابه
له خيره وشره الى من تغضبت=سيفاً بتولاً لاطلع من نصابه
وياكاتب القيفان ماعمري أذهبت=لامن زهمته صار عزوه ولابه

/


/


حصل على المركز الرابع


قصيدة الشاعر / عوض بن شذيان الجذلي رقم (4 )

خذ المعاني من ضمير ي الى جبت=من هاجساً ميجيب نقص الإجابه
محبوك بالمعنى ولاله تصاعبت=من شاعراً لاقال مخطى صوابه
مبعد عليه لانويت وتقربت=الى زهمته جت تسابق اركابه
الشعر يطربني ونا له تطربت=لاصار بالمعنى جزيلاً صلابه
ماكل من حط الهدف قال انا اعطبت=لوكان بالمحزم كثيراً زهابه
الشعر ميراث العرب لاتعجبت=ارسالتاً من قبل عصر الصحابه
ترسل به المرسول لامن تغربت=من ديرة الغربه لدار القرابه
الشعرميداناً وانا به تدربت=وفي عرفي ان الشعر مفتوح بابه
ماتملكه مهما بدربه تعذبت=أحداً شرب وحداً يتابع سرابه

/



/


حصل على المركز الخامس


قصيدة الشاعر/ شاهين النوايف .. رقم (5 )

أعوذ بالباري من الكفر والجبت=بسم الااله ومانزل في كتابه
بسم العزيز اللي له أمنت وأنبت=أبدا تماثيلي ونص الاجابه
سلام ماشرقت مره وغربت=على هل الطولات وأهل المهابه
بلي هل الماجوب مهما تغربت=وغلاهم بقلبي كتبته كتابه
والشعر غيض وفيض مثل ماجربت=وسبك الجزايل والردي وجتنابه
وانا جزيل الشعر منه تشربت=وخالط دما قلبي وروحي مشابه
وياما علشان القصيده تتعبت=واغربت في المعنى وزدت الغرابه
وياما لخطلان الايدي تسببت=في حيرة الأفكار في قو جابه
وياما من الأشعار عربت واعربت=من هاجساً يزيد وسع ورحابه
وفي جزل نظم الشعر والقيل حاربت=أهل التجسس والخزا والعيابه
وكتبت في وصف الغواني وتشببت=ومدحت جزل الطيب واللي سعابه
وصلاة ربي عد شعري وماجبت=على النبي وأله وكل الصحابه

/



/


/



/

حصل على المركز السادس
قصيدة الشاعر/ ناصر بن سليم العصباني .. رقم (7 )

جتني رسالة منتدانا ورحبت=رحبت بالمكتوب واللي بدا به
ومن بعد هذا / انا وشعري تجاذبت=حديث حول الشعر واللي حكابه
جاب اسئله فيها سألني وجاوبت=ومابه سؤال الا عرفت الاجابه
يالشعركم بي من هواجيس واعربت=عنها بقافن فيه فن اوصلابه
الشعرفي دمي وانا فيه رتبت=ابيات لو تمطر تسيّل اشعابه
والشعرحكمه,فن,مع ذوق,لاصبت=وان قل قدر البيت بيّن خرابه
ولاصار مانت امثقفن فيه ..قل تبت=وابعد عنه لاتقربه وش تبابه
والشعرفي بحره ليامن تدربت=له فن ثابت مثل فن الخطابه
واليوم ياشعري علي العالي ارقبت=مرقاب ماترقا به الا الذيابه

/



/


حصل على المركز السابع


قصيدة الشاعر // محمد ظاهر الميهوبي.. رقم (2 )

حي المثايل من مشاعر ورحبْت=ترحيب يلفي من نظمها وجابه
من روعة الابداع لأجله توهْبت=شاعر مع الشعار حضر زهابه
اما فرزت من المعاني ودربْت=وإلأ كسبت من النشاما صوابه
من بعدها ياشعر عطني وماجْبت=من واقع الإحساس جملة جوابه
ياشعر حكْمها على ما تورْبت=وانت الذي باسمك جميع نتشابه
ياشعر علمني انا كم تعذبت=لأجلك مع النوماس نشوة عذابه
صدقت انا معناك مره وكذبت=فيض المشاعر عند شاعر ونابه
والفكر ميدان القصايد وهذبت=خيل المعاني مْسرجاتْن ركابه
اذا ارتفع بيتك للأطناب كربت=حتى يجي معناك ما له مشابه
شاعر بناها واعتلى هظبة التبت=وشاعر بناها لو طويله خرابه
يا شعر أعرفك زين ياشعر ماعبت=إلا مشاعر عند شاعر عيابه
يا شاعر القمه بعد مثلك ارقبت=خلْت المعاني في سؤالك إجابه
في منتدانا مع نشاما لنا طبت=يبقى الفخر موجود من فخر لابه
عشقي قصيدي يامشاعر ولا تبت=وشعري يمثلني بحضرة جنابه

/


/

حصل على المركز الثامن

الشاعر / ثامر ظميان البلوي .. رقم ( 8 )

الشعر هم و غم وحساس يثبت=مثل اللحن بيدين عازف ربابه
كذا كذا ياتي ويذهب ولاهبت=دام الشعور إيهد مثل الذيابه
يقرب ويبرك للجزيلة وانا صبت=راس الشعر واخذت منه المهابه
واذا ابتدا المشوار بالشعر واعزبت=ميشيب قافي لين ياخذ حسابه
واليوم والله يا شعر ليه ماتبت=مادام بعض الناس ناقص زهابه
منهو يبيك مقدرك عنه جنبت=ونوخت للي مايدرج ركابه
شرق عن المقصود ولا انت غربت=ويامر على الطاروق حظرة جنابه
وفيهم من الشعار شاعر واذا بت=مثل الاسد يحكم ثمانين غابه
ماني مزكي نفسي اليوم لاغبت=كل(ن) من الشعار ينفض ثيابه
لاهنت والله ياقصيدي ولا خبت=والشعر سيف(ن) ويل منهو سطابه
الشعر كلمة حق والحق يثبت=عند الرجال اليوم ماهي طلابه

لا يسعنا في نهاية هذه المسابقة إلا أن نتقدم بالشكر الجزيل


لكل الإخوة الشعراء الذين شاركونا و يكفينا شرف حضورهم


و تواجدهم بيننا .. و إلى أن نلتقي معكم في مسابقات قادمة


نستودعكم الله ... و بالتوفيق للجميع .



مشرف الأدبية

الله يوفقكم أجمعين ,

فالبدايه احب ان اشكر أخي الشاعر المتألق عايد السميري الذي طالما عمل ويعمل جاهداً للارتقاء بهذا المنتدى وخاصه قسم الشعر وثانياً الشكر موصول الإخواني الشعراء الذين فازو بالمركز الأول والثاني الأخ الشاعر سلطان البوي والشاعر اسعد السحيمي وكافة المشاركين في هذه المسابقه النزيهه وتقبلو مروري وتحياتي اخوكم الشاعر عبدالرحمن الجذليالفائزبالمركز الثالث

نتمنى لجميع الإخوة الشعراء التوفيق



و في الحقيقـــــــــة أن القصائد كلها كانت غاية ً في الروعـــــــة و الجزالة ..



يكفينا شرف حضورهم و مشاركتهم لنا ..



و دام الجميع بكل خير .

الف شكر لهولاء الشعراء الذين امتعونا بابداعهم

واسعدونا بمشاركاتهم القيمة

,

والف مبروك للجميع

/