قصيدة الوابصي في معاناته مع الزراعة

لو اني دريت ان الزراعة غرابيل=مالي بها لو يمنحوها بلاشي
لو بالزراعة خير ما جو هل النيل=اللي على وجه الثرى ماه ماشي
يا ويش ناس تلحق الماء بعد ميل=في منطقة صبخا حماد قراشي
لعصر تدفنها الهبايب و بالليل=لو انك سقيت الزرع يصبح عطاشي
ياما كلينا من عذاب و بهاذيل=و ياما خسرنا من نقود و شواشي
شي يهد المال و العيال و الحيل=لاشك يسترها منشي النواشي
بعنا البيوت و ثم بعنا المعاميل=و يا ليت ما تلحق لبيع الفراشي
حنا مهابيل و جبنا مهابيل=و معاشهم غير ادفعه من معاشي
نشوف خضره مير ما من محاصيل=و نوبات يا كلها جراد و فراشي
و البنك ما يقبل عذر و محاييل=يقول لازم تدفع القسط كاشي
و منين ندبر قسطكم يا رجاجيل=و الفايده ما غير جفره و حاشي
مير امهلوني لو ثلاثة مهاليل=يجي الفرج من واحد ما يخاشي

قصيده طريفه وجميله صح لسان الشاعر الوابصي
وشكرا لك أخي ابراهيم اللوط