من قصايد الشاعر مقبل سليم البلوي

السلام عليكم ورحمة الله وبركاته
هذه قصيده من قصايد مقبل البلوي
بعنوان

صدر الشمالي

صدر الشمالي ما يضيق بثواني
العام ولا اليوم هذا المثل غير
ما هو غريب ان الشمالي يعاني
من ضيقة الخاطر إلى مرت عصير
صبراً جميل ويالله المستعاني
طول غيابك يا صباح التباشير
لو الحوايج تنقضي بالاماني
كلاً تمنى اللي على باله يصير
حتى الفقير المستدين المداني
يمسي ويصبح من كبار الهوامير
ما ضاق باله بالخفى والبياني
ولا جال مع جول النجوم السواهير
عصر الفضى و مزخرفات المباني
فيه القسى واللين و الشر والخير
غير حياة الناس قاصي و داني
اللي طلع واللي تحت طية البير
حتى الصداقه ما عليها ضماني
ما ادري غلط ولا نسميه تقصير
لا جت من الاصحاب فيه وجه ثاني
الوجه الاول ما تدره معاذير
قالوه قبلي من قديم الزماني
العذر ما يعشي ضيوف و مسايير
يا صاحبي مشكور دعني وشاني
تضيق ولا ما تضيق المعابير
كفاني اللي في زماني كفاني
والله جعل في نعمة العقل تفكير
تمدحني الحساد ولا تهجاني
فوق الجبال النايفه ماكر الطير
ابعد عليهم من سهيل اليماني
والبعد زين وبه معزه و تقدير
وإن غير التيار شكل المواني
و بدا على بعض المحطات تأثير
الضلع راسي بالقسى و اللياني
ما هو حصاه يهزها كل معصير

شعر : مقبل البلوي