الوطن حبه تمكن بالخفوق=حب فطري ماتشوبه شايبه
الولا مجبول فينا ومخلوق=والمشاعر في وطنا ذايبه
من قبيله لاتخون ولا تبوق=من خلقها الله تسد النايبه
وانت يالي تحتفل في كل سوق=جبت بدعه عن بلدنا غايبه
تحسب التفحيط والازعاج ذوق=مرتكبنا بالسلوك الخايبه
لبسك البنطال عيب ولايلوق=مالبسه ابوك قبل وشايبه
والشعر لاهو طويل ولامحلوق=منظره مخزي يجيب العايبه
تدعي بالحب وافعالك عقوق=القضا والأمن منتا هايبه
ماتعرفوا واجبات ولا حقوق=انحلال افكار واشيا سايبه
الوطن عزه رجاجيل ن تتوق=للشهاده والعلوم الطايبه
مايدافع عن وطنه الا الصدوق=الفتى راع العلوم الصايبه
والحقيقه ودنا الجاهل يروق=للهدف هذا قصيدي جايبه