رحله الى الديره

ربوع بلادي علينا بتنادي تقول تعالوا شوفوني يا أولادي

ماعلينا خلونا في موضوعنا
...
.
.
.
.وشرايكم نروح رحله مع عايله سعوديه للديره.

الصيف جاء وجريا على العادة العائلية كل سنة لازم العائلة كلها بقضها وقضيضها تروح الديرة ليه بدون سبب لأن الاب يبي يروح وبس يمكن يقول خلوا الناس يشوفون ا لبنات عشان يخطبونهم هنا ماحد يعرفنا وبيعنسون بناتناعندنا
كل سنة تشحن العائلة في صالون العائلة والى الديرة
العفش المحبب الى النفس .. كل واحد بشنطة خاصة فيه مستقلة..
كل واحد اخذ بطانية (حر وقيظ مع ذلك بطانية )
انواع الاكياس فيها كل شئ وكل ماشئ ..

والطريق رحلة برية تتخللها نوم وزهق وحر وقيظ والكثير الكثير من هرج البزران وازعاجهم..
يبه كم باقي؟؟
يبه طولنا؟
يبه متى نحط الفطور؟
يبه شغل اغنية
يبه محمد اخذ نعالي
يبه نورة تقرصني
يبه
يبه
يبه
والام خلاص ياعيال اقعدوا ابوكم تعبان خلوه يركز < === ابو الروقان اللي انت فيه ياشيخة

والاب ماشاء الله عليه مبسوط يغني ورايق ويمكن يشرب شاهي بعد
قاعد يكلم الام اللي نصها نووم
لا ماشاء الله اشوى اننا مشينا بدري لحقنا البراد يمدينا نوصل قبل ماتحتر الشمس ....
ويطلع يده يقيس حرارة الهواء
مايمديهم يمشون 100 كم الا بدأت المعاناة
يبه وقف أبي الحمام
ليه مارحت من البيت ماقلت لكم روحوا قبل مانمشي
رحت يبه بس ابي الحمام مرة ثانية
ويوقف الاب غصب عنه والا بيقعد طول الطريق في حرب كيمائية..
توهم ماشين خمسين كيلو يصرخ الثاني يباااااااا نبي حمام والاب يخاصم تونا وقفنا ليه مارحت مع اخوك من شوي
وهذاك يصيح ماكان فيه شئ
الاب :اصبر شوي الين نوصل عند المحطة الجاية
والبزر يصيح ماقدر خلاااص <== مدة خلاص لها نغمة خاصة دليل ان ماوقفت الان ترى لاتلومون الا انفسكم..
ويوقف الاب غصب عنه

وشوي تجي بنت من اخر الصالون متغطية من اول مامشوا كانت نايمة مااحد درى عنها صحت وتشوف لها جبل ولا ضلع وتقول الله يووباا خلينا نوقف هنا ترى المكان هنا مررررررة حلو اخوها جنبها قافلة معاه خرمان تتن ومو قادر يدخن معاه ابوه اقول اسكتي خلاص خلينا نشد الخط ونخلص كل شوي موقفين..

طبعا هذا الرحلة فيها العجب
الولد المراهق مهرب افلام معاه حاطها في كيس ورى وسط الكنادر مع العفش
والطفل الصغير شايل معاه اشرطة بلاي ستيشن بيوريها عيال عمه هناك >>>>>طبعا قهره لهم مو حب
والبنت أنواع المكياج والسشوار مع أنه ماراح يشتغل ما في كهرب بس كذا قهره لبنات العم
الام كل شوي مسويه فيها رومانسية ورحلة عائلية تصب قهوة للاب وهو يمشي..
اللي لاقيتها في الرحلة هذه الشغالة ماغير شخيررررررر وعزف منفرد ماحد حولها ابد ولا احد يبي منها شئ..

تناصفوا في الرحلة..
وقف الاب يريح وبدؤوا ينزلون العفش حق الفطور
وماشاء الله عليهم رايقين وراعين طويلة
ينزلون القز (الدافور) بيسوون شاهي والام تفرش سفرة والفطور مكوناته تونة.. جبن كرافت علب .. جبن البقرات الثلاث.. جين كاسات... مربى توت .. زيتون.. وحلاوه طحينيه
والعيال ماهم حول الفطور
وكل شوي الام تنادي محمد يا أمغبر عساك باللده يلا نبغى نمشي والبنت قاعدة تمشي ومشغلة المسجل وخاشة جو ابوو الجو اللي تعرفينه ياشيخة حر وتعب وش هالمزاج تكفون ؟؟!!
والام تناديها تعالي يابنيتي افطري خلاص شيلي السماعات من اذنك والبنت ماتسمع
الولد قافلة معاااه خرمان ولا معاه تتن ولا هو قادر يتتن معاه اابووه وشياطينه طايرة يخاصم اخوانه الصغار..
انت ياورع انت واياه يالله بنمشي واللي يبي حمام من هالحين يخلص ماحنا اموقفين له
يمشون في الطريق .. طولت الرحلة وبدات معالم الزهق تطلع عليهم كلهم وتخرب الاخلاق بقووة..أكثر شئ يغث في السفر بالبر هو كثرة الوقفات لأنها تطول الوقت
الاب رمى الشماغ بدال ماهو مشخص من اول الطريق وهذا دليل على أنه عصب وما يبغى يسمع صوت أحد


طبعا الكل فهم الاشاره وسكت الا ورع ملقوف صغير من ابو اربع او خمس سنوات قعد ينطنط وينشد أمي ما أحلاها

.نفخ الاب ورفع راسه فوق .. وناظر حرمته .. وقالت لولدها اقعد ياوليدي الله يهديك خل بابا يعرف يسوق .. الولد واصل لقافته ...... الام : ليه ما تنثبر أحسن لك وللا يجيك أبوك بالعقال>>>>>>>>>> راحت الذرابه منها
الاب ينادي على بنته يابنتي عطينا من اشرطتك نسمع اغنية نقطع بها الطريق..
البنت اعطته شريط ...
شوي وتطلع اغنية مالها اول من آخر ولحنها كانها دبة غاز تدحرج من الدرج
صك الشريط بقوووة ورمى الشريط في وجه البنت وقال الله يهديك هذه اغاني تسمعونها وقام يهيجن لحاله والام تنافق له الله الله عليك وش ذا وين مخبي عنا هالصوت >>>>>>>>>>>> أبوك يا النصبه

صدق عمره الاب وقعد يقول أي هذاك أول بس الحين تقل كني مدشوب شوي امسوي على صوتي


طبعا هالحين قربوا من الديرة وبدا عاد يتفلسف

عليهم..
شايفين هالضلع وانا ابوكم جدكم الخامس طعش انذبح على هالضلع ذبحوه عيال فلان عشان قضية ثار
وهالشعيب ضاعت فيه عنز لجدتكم
والوادي وانا صغير كنا نشوفه بعيد عن الديرة سبحان الله وشلون صار قريب وكيف انه مرة سال هالوادي وفاض وغمر النخل اللي في الديرة
ونص هالسوالف جد والباقي لاقي عياله هالحبيب وعياله مالين من هالسوالف لأنهم كل سنة اذا جو في هالمكان يسمعونها..

وبس. أن جازت لكم القصه كملت باقي الرحله

بصراحه القصة جازت لي

بس كيف ابتكرت هذي القصه وانت في الاسكندريه

كيف لو انت بالديره وش تسوي

فعلا حلقة من طاش ما طاش

يسلم يمينك

اوسكار

شكرآ اوسكار دائمآ مبدع كما عهدناك

ترجع بالسلامه

لاتتأخر بتكملة القصه الشيقه

سلمت يمينك

السلام عليكم ورحمة الله وبركاته

اول شيء كمل لنا قصتك ذيك مع المكيف ...


أما القصة هذه يبغى لها جلسة خاصة ...

أوســـكــــــار ..

والله من جد زي ماقال أبو نادر هــذي يبغالها جلسه خاصــــه

أطيب الـمُــنــى ،،

سـلـمـان الـعـــــــرادي

الينك عشت هالقصه

والا كيف قدرت توصل لكل هذه التفاصيل

لك تحيتي


عبدالله الوحيشي